सुकुटी माछा’ किलोको रु पाँच हजार

बागलुङ, १८ कात्तिक । बागलुङको दरमखोलामा पाइने असला माछा सुकाएर बेच्दा प्रतिकिलो रु. पाँच हजारमा बिक्री हुने गरेको छ । आलो माछाको मूल्य भने प्रतिकिलो रु पाँच सय रहेको छ । दुई वर्षअघि रु तीन हजार पर्ने ‘सुकुटी माछा’को मूल्य अहिले बढेर रु पाँच हजार पुगेको हो । सुकेको माछाको माग र रोजाइृ बढेपछि मूल्य पनि बढेको हो । छुट्टिमा नेपाल आएकाले जापानलगायतका मुलुकमा जाँदा सुकुटी लिएर जाने प्रचलन नै बसेको छ । विदेशमा रहेका आफन्तलाई पठाउने आकर्षक कोसेली पनि सुकेको माछा बन्ने गरेको छ । गाउँमा भन्दा विदेश लैजानेले महङ्गो मूल्य तिरेर माछा किन्ने गरेको मल्म–६ आँगाखेतका व्यवसायी बाबुराम केसीले बताउनुभयो । “सुकाएको माछाको माग अत्याधिक छ,” उहाँले भन्नुभयो– “जापानमा बाहेक काठमाडौँ, पोखरासम्म पुग्ने गरेको छ ।” स्वादका हिसावले असला माछा ग्राहकको रोजाईमा पर्ने गरेको व्यवसायीको भनाइ छ । दरमखोलाको माछा यस क्षेत्रमै प्रख्यात छ । पासा थापेर र जाल हानेर मारेका माछालाई व्यवसायीले आलै र सुकुटी बनाएर बेच्ने गरेका छन् । जिल्लाको मल्म र काँडेबास क्षेत्रमा मात्रै दैनिक ५० जनाभन्दा बढी व्यक्तिले माछा मार्ने गर्छन् । माछा मार्ने व्यक्ति केहीले आफँै सोझै उपभोक्तालाई बेच्ने गर्छन् भने केहीले कम मुनाफा राखेर अर्को व्यवसायीलाई बेच्ने गरेका छन् । सुकेको माछाको माग बढ्दै गएपछि मूल्य पनि वृद्धि हुँदै गएको हो । दसैँ मान्न घर आउनुभएका मल्म–६ का प्रशान्त थापाले जापान फर्कँदा सुकुटी माछा लैजान किनेर जोहो गरिसकेको बताउनुभयो । जापानमा दरमखोलाको माछा सबैका लागि महत्वको ‘चीज’ बन्ने गरेको उहाँको भनाइ छ । स्थानीय उपभोक्ता तथा होटल–रेष्टुराँमा जाने ग्राहकका लागि पनि माछा रोजाईमा पर्ने गरेको मल्म–७ बाँस्खोलाका व्यवसायी मनराज रानाले बताउनुभयो । “माछा मार्न सकियो भने बिक्रीको लागि कुनै समस्या छैन” उहाँले भन्नुभयो । खोलामा बम हान्न, विष हाल्न र विद्युतीय शक्ति लगाएर माछा मार्न प्रतिबन्ध लगाइएको छ । स्थानीय प्रशासनले पनि अनाधिकृतरुपमा माछा मार्ने कार्यलाई रोक्न निगरानी बढाएको छ । दरमखोला आसपासका क्षेत्रमा बसोबास गर्ने कतिपय परिवारको जीविका माछा मार्ने रहेको छ । माछा मार्ने र माछाका परिकार उपलब्ध गराउने होटल–रेष्टुराँका व्यवसायीले पर्याप्त आम्दानी गर्दै आएका छन् । रासस

Read More

विराटनगरबाट सार्वजनिक यातायातका बस सुचारु

विराटनगर, १८ कात्तिक । असी दिनदेखि ठप्प रहेको सार्वजनिक यातायातका बस आजदेखि सञ्चालनमा आएका छन् । जारी मधेस आन्दोलनमा बन्द रहेको यातायात सेवा आज बिहानदेखि विराटनगर बसपार्कबाट इटहरी हुँदै पूर्वको काँकडभिट्टा, विर्तामोड र भद्रपुरतर्फ सञ्चालन भएका छन् । विराटनगरको नगर क्षेत्रमा भने विद्युतीय रिक्सा, टेम्पोलगायत छोटो सार्वजनिक यातायातका गाडी लामो समयदेखि निर्वाध रुपमा गुडिरहेका छन् । ठूला सार्वजनिक यातायातका सवारी साधनहरु आजदेखि निर्वाध रुपमा सञ्चालनमा ल्याउनका लागि मङ्गलबार यातायात मजदुर र व्यवसायीले विराटनगरमा छलफल कार्यक्रमको आयोजना गरेका थिए । विभिन्न राजनीतिक दलका साथै बन्दकर्ता दलका प्रतिनिधिको उपस्थितिमा यातायात मजदुर र व्यवसायीले लामो समयको बन्दका कारण जनजीवन अस्तव्यस्त हुनुका साथै भोकभोकै बस्नुपर्ने अवस्था सिर्जना भएकाले आजदेखि बस, माइक्रोबस र टेम्पोलगायत सवारी साधन चलाउने घोषणा गरेका थिए । रासस

Read More

भारतीय भन्सारले रोकेपछि पूर्वी नाकामा पाँचसय गाडी अलपत्र

काँकडभिट्टा (झापा), १८ कात्तिक । पूर्वीनाका काँकडभिट्टा भएर नेपाल प्रवेश गर्ने अनुमति पर्खिरहेका इन्धन बोकेका तीसवटा ट्याङ्करसहित ५०० भन्दा बढी नेपाली मालबाहक गाडी भारतीय नाका पानीट्याङ्कीमा अलपत्र परेका छन् । आज बिहान पाँचवटा सामान्य सामान बोकेका नेपाली गाडी मात्र नेपाल प्रवेश गरेका छन् । भारतीय नाकामा भन्सार प्रशासनले सुरक्षा निकायको निर्देशन बिना गाडी पास गराउन नसक्ने बताउँदै आएको छ । मेची पेट्रोलियम डिलर्स एसोसिएसनका अध्यक्ष लय भण्डारीले पर्याप्त तेल आउन नपाउँदा इन्धन समस्या झन् जटिल बन्न थालेको बताउनु भएको छ । उहाँका अनुसार हिजो काँकडभिट्टा नाकाबाट एक टयांकर हवाई इन्धन र एउटा ग्यासको बुलेट मात्र भित्रिएका छन् । पेट्रोल र डिजेल बोकेका गाडीलाई भारतीय सुरक्षाकर्मीले चेकजाँच गर्नुपर्ने बहानामा रोकिराखेका छन् । वीरगन्जमा प्रहरीसँगको झडपमा भारतीय नागरिक मारिएको घटनापछि पूर्वी नाकामा भारतीय सुरक्षाकर्मीले माथिको आदेश भन्दै नेपाली गाडीलाई प्रवेश अनुमति दिन कडाइ गरेका हुन् । काँकडभिट्टा इलाका प्रहरी कार्यालयका प्रहरी नायब उपरिक्षक श्याम अधिकारीले भारतको पानीट्याङ्की नाकाबाट तीन दिनदेखि गाडी आउने क्रम कम हुँदै गएको बताउनुभयो । पानीट्याङ्की नाकादेखि भारतको अर्को बजार नक्सलबाडीसम्म नेपाली गाडी राजमार्गमा लाम लागेका छन् । त्यस क्रममा नेपाली सामान र चालकको असुरक्षा बढेको ढुवानी व्यवसायी बताउँछन् । रासस

Read More