कार्तिक १६, २०७२- नायिका अशिष्मा नकर्मी यति बेला प्रदर्शनरत फिल्म ‘अधकट्टी’ को गीत ‘मेरो फिगर कोकाकोला...’ मार्फत फिल्मी दर्शकमा बढी चिनिइन्। उनी त्यसअघि नै नेवारी फिल्मका दर्शकमाझ परिचित कलाकार हुन्। अभिनयमा दत्तचित्त अशिष्मा पछिल्लो समय निर्देशककी मनपर्ने नायिकामा पर्छिन्। उनलाई चाहिँ के मनपर्छ त?
ठाउँ
अहिलेसम्म पुगेका गाउँमध्ये मन परेको त मुस्ताङ नै हो। नेपाललाई स्वर्ग भनिन्छ। त्यहाँ पुगेपछि बल्ल फिल भयो। सुन्दर क्षितिज, ताल, हिमाल सबैको सम्मिश्रण नै त्यही भएकाले नेपालको स्वर्ग नै मुस्ताङ हो जस्तो लाग्यो।
विदेश
युरोप मलाई एकदमै मनपर्छ। आइफल टावर हेर्ने ठूलो इच्छा थियो, त्यो पूरा भयो। अब जान मन लागेको ठाउँ अस्ट्रेलिया हो।
परिकार
नेवारी खाना मनपर्छ। तर म धेरै पिरो खान सक्दिनँ। त्यसैले नेवारीबाहेक जापनिज, कोरियन खाना मनपर्छ। किनकि ती खानामा अलिक स्पाइसी कम हुन्छ।
पहिरन
किन किन मलाई साडी, लेहेंगा नै मनपर्छ। दैनिक रूपमा त म क्याजुअल पाइन्ट, सर्ट नै लगाउँछु। तर अकेजनल्ली साडी, लेहेंगा लगाइरहेकी हुन्छु।
सवारी साधन
हाम्रो सडकको अवस्था हेर्दा सबैभन्दा सजिलो त स्कुटर नै हो। मसँग पनि स्कुटर नै छ, त्यही मनपर्छ। ड्याडीले सधैं गाडी किन भन्नुहुन्छ। पैसा पनि दिइसक्नुभएको छ। उहाँको इच्छा पूरा गर्न लिन पनि सक्छु। तर जब मेरो कमाइ बलियो हुन्छ र मेन्टेन गर्न सक्ने हुन्छु तब मात्रै लिन्छु। अहिले पाँच सयले हुन्छ भने गाडी भएपछि पाँच हजार रुपैयाँले पनि नपुग्ला।
फिल्म कि म्युजिक भिडियो?
दुवै उत्तिकै मनपर्छ। खासमा मलाई अभिनय मनपर्ने भएकाले फिल्म, सर्टफिल्मको होस् वा म्युजिक भिडियोको, सबै मनपर्छ।
नेवारी फिल्म कि नेपाली फिल्म?
दुवै। नेवारी फिल्म मेरो पहिचान हो भने नेपाली फिल्मले मलाई अशिष्मा भनेर अलि बृहत् रूपमा चिनाएको छ। दुईमध्ये कुन रोज्ने भन्नु भनेको कुन चाहिँ आँखा फुटाउने भनेर सोधे जस्तै हो मेरा लागि।
फिल्म
लभस्टोरी र त्यसपछि कमेडी फिल्म मनपर्छ। ऐतिहासिक फिल्म पनि हेर्न मनपर्छ। विदेशी फिल्ममा ‘अ वक टु रिमेम्बर’ मनपर्छ भने नेपाली फिल्ममा ‘प्रेमपिण्ड’ र ‘कुसुमे रुमाल’।
अभिनेता
अहिलेसम्म मनपर्ने एक्टर मेरा लागि त मह जोडी (मदनकृष्ण श्रेष्ठ र हरिवंश आचार्य) नै हुनुहुन्छ।
अभिनेत्री
मिथिला शर्मा र गौरी मल्ल।
पुस्तक
म त्यस्तो साहित्यको पाठक त होइन। तर पढेकामध्ये एकदम मन परेको भनेको
‘द सेक्रेट’ पुस्तक हो।
नेता
मरिचमान सिंह। अहिलेको अवस्थामा आएर बुझदा देशलाई चाहिने नेता भनेको उहाँ नै हो जस्तो लाग्यो। अहिले हामीलाई राष्ट्रिय स्वाधीनता रक्षाका लागि मरिचमान जस्तो नेता चाहिएको छ।
